Kaspi “Ürəklə gəl, ürəklə al” adlı xeyriyyə yarmarkası təşkil edir

Kaspi Uşaq Bağçaları və Kaspi məktəbəqədər tədris müəssisələri tərəfindən Xeyriyyə Festivalı keçiriləcək

Kaspi Təhsil Şirkəti ənənəsinə uyğun olaraq Xeyriyyə Festivalı keçirməyə hazırlaşır. Kaspi KİDS və Uşaq Bağçaları tərəfindən 4 və 11 mart tarixlərində təşkil olunan “Ürəklə gəl, ürəklə al” adlı festivalda balaca şagirdlərimiz öz valideynləri və müəllimləri ilə birlikdə müxtəlif stendlərdə satışlar təşkil edəcəklər.

Kaspi Təhsil Şirkətinin baş direktor müavini, İdarə Heyətinin üzvü Əli İsgəndərov kaspi.edu.az-a bildirib ki, festivalın keçirilməsinin əsas məqsədi toplanmış vəsaitin “Yaşat” (Azərbaycan Respublikasının ərazi bütövlüyünün müdafiəsi ilə əlaqədar yaralananların və şəhid ailələrinin təminatına dəstək fondu), “Yaşama dəstək” (Kəpənək, İxtiyoz və İmmunadefsit xəstəliyindən əziyyət çəkən uşaqlara dəstək fondu) fondlarına və Türkiyədə baş vermiş zəlzələdən əziyyət çəkənlər üçün AFAD-a (Türkiyədə baş vermiş zəlzələdən zərər çəkənlərə dəstək fondu) ianə olunmasıdır: “Valideynlər bu yarmarkada övladları ilə birgə 2 istiqamətdə - təşkilatçı (satıcı) və iştirakçı (alıcı) kimi iştirak edəcəklər. Bundan əlavə, festivalda qonaqları bir-birindən maraqlı şou proqramlar, yarışmalar, master-klaslar və sürprizlər gözləyir.”

Qeyd edək ki, artıq valideynlərlə müəllimlər yarmarkanın təşkili üçün birlikdə fəaliyyətə başlayıblar. Həmçinin Kaspi Xeyriyyə Festivalında  Kaspi Uşaq bağçasının və Məktəbəqədər hazırlıq bölməmizin nümayəndələri - 4, 5, 6 yaşlı uşaqların iştirakı ilə müxtəlif yarmarkalar təqdim olunacaq, müəllimlərimizin təşkilatçılığı ilə bir neçə ustad dərsi, habelə, uşaqların hazırladıqları rəngarəng mahnı nömrələri qonaqlara təqdim olunacaq. Novruz bayramının atributları – Kosa, Keçəl, Bahar qızı və Cirtdan da qonaqları salamlayacaq.

Xeyriyyə festivalının açılış mərasimi martın 4-də, saat 11.00-da  Sumqayıt şəhəri – 6-cı mikrorayon, H.Salayev 31A - Kaspi Uşaq Bağçası Sumqayıt filialında baş tutacaq.  11 mart, saat 11.00-də Bakı şəhəri, Xətai rayonu, Xocalı pr. 57A, Kaspi Liseyi Ağ şəhər filialında yarmarkanın yekun tədbiri keçiriləcək.

Yarmarkaya giriş sərbəstdir. Hər birinizi xeyriyyə yarmarkasında gözləyirik!

Kaspi.edu.az