Valideynlərə yeni tədris ilinə hazırlıq işləri ilə bağlı məlumat verilib

Görüş qarşılıqlı əməkdaşlığın zəruriliyini vurğulayan mühüm platforma kimi dəyərləndirilib.

Kaspi Ağ Şəhər liseyində 5-ci sinifdə oxuyan şagirdlərin valideynləri ilə görüş keçirilib. Tədbirdə liseyin direktorunun 5–11-ci siniflərin rus bölməsi üzrə müavini Səbinə Hüseynova və digər müəllimlər çıxış edərək valideynləri maraqlandıran bir sıra mühüm məsələlər barədə ətraflı məlumat veriblər.

Görüş zamanı şagirdlərin ibtidai sinif mərhələsini başa vuraraq orta təhsil pilləsinə keçid prosesinin pedaqoji, psixoloji və metodoloji baxımdan xüsusi əhəmiyyət daşıdığı qeyd olunub, bu mərhələnin uşaqların həm akademik inkişafında, həm də sosial-mənəvi formalaşmasında mühüm dönüş nöqtəsi olduğu vurğulanıb. Çıxış edənlər şagirdlərin yeni fənnlər sistemi ilə tanış olarkən qarşılaşa biləcəkləri çətinliklər, onlara dəstək göstərmək üçün tətbiq olunacaq metodik yanaşmalar, müəllim–valideyn əməkdaşlığının əhəmiyyəti və fərdi inkişafın stimullaşdırılması kimi məqamları ətraflı şəkildə izah ediblər.

Bundan əlavə, yeni tədris ili ilə bağlı hazırlıq işləri, dərs prosesində nəzərdə tutulan yeniliklər, təlim–tərbiyə mühitinin zənginləşdirilməsi istiqamətində atılacaq addımlar və kollektivin gələcək fəaliyyət planları müzakirə olunub. Xüsusilə qeyd olunub ki, valideynlərin məktəb həyatında fəal iştirakı, müəllimlərlə davamlı ünsiyyəti və şagirdlərin təhsil yolunda dəstəkləyici mövqe tutmaları uşaqların uğurlu inkişafının təmin olunmasında əvəzsiz rol oynayır.

Ümumilikdə, görüş həm valideynlərin təhsil prosesindəki rolunun bir daha ön plana çəkilməsi, həm də şagirdlərin ibtidai mərhələdən orta təhsil mərhələsinə daha asan və səmərəli şəkildə keçidini təmin etmək üçün qarşılıqlı əməkdaşlığın zəruriliyini vurğulayan mühüm bir platforma kimi dəyərləndirilib.

Kaspi.edu.az