Kaspi Liseylərini ABŞ-da 3 şagirdimiz təmsil edəcək

Şagirdlərimiz “VEX Robotics” yarışmasının finalında iştirak etmək üçün ABŞ-a yola düşürlər

Kaspi Liseyinin şagirdləri “VEX Robotics” yarışmasının finalında iştirak etmək üçün ABŞ-a yola düşürlər. Liseyin komandası dünyanın ən böyük robototexnika müsabiqəsi olan “VEX Robotics”-də ölkəmizi təmsil edəcək. Final yarışması 25 aprel-4 may tarixində ABŞ-ın Texas ştatının Dallas şəhərində keçirilir. Beynəlxalq yarışmaya 100-dən çox ölkə, 200-dən çox komanda qatılıb.

Liseyimizin şagirdləri kateqoriyalarına uyğun  29 aprel-3 may tarixində yarışacaqlar.

Xatırladaq ki, beynəlxalq yarışmanın 27 fevral - 3 mart 2023-cü il tarixlərində Heydər Əliyev adına Müasir Təhsil Kompleksində keçirilən finalında Bakıxanov Filialının “Predator” komandasının üzvləri Ömər İsgəndər, Elnur Yusibov və Orxan Abduləliyev 182 xal yığaraq indiyə qədər ölkədə rəsmi çempionatlarda yığılmış rekordu təzələməyə nail olublar. Şagirdlərimiz ən yüksək xala imza ataraq Azərbaycan turnirinin qalibi adını qazanıblar. Bu tutul onlara Elm və Təhsil Nazirliyinin xətti ilə ölkəmizi ABŞ-da təmsil etmək hüququ qazandırıb.

Kaspi.edu.az ABŞ-a yola düşməzdən əvvəl liseyin şagirdləri ilə söhbətləşib. Qaliblərimizin sevinci hədsizdir.

Liseyin 9-cu sinif şagirdi, komandanın üzvü Ömər İsgəndər “VEX Robotics” üzrə yarışın finalına həyəcanla hazırlaşdıqlarını deyir: “Eyni yarışın Azərbaycan turunda çempion olmuşuq. Amerika dünya turuna vəsiqə qazanmağımızdan qürur duyuruq. Artıq 4 həftədir ki, “VEX Robotics” üzrə robotumuzu hazırlayırıq. Ümid edirəm ki, Amerikadan qalib olaraq qayıdacağıq”.

Komandanın üzvü Elnur Yusibov həyəcanlı olduğunu etiraf edir: “Yarışmanın Azərbaycan finalında 25 komanda arasında çempion olmuşuq. Bu, böyük uğurdur. Baxmayaraq ki, robotumuzda bəzi problemlər çıxdı, amma biz bunu həll elədik və qalib gəldik. Hazırda Amerikadakı finala hazırlaşırıq. Etiraf edim ki, həyəcanlıyam, həm də böyük qürur hissi keçiririk. Ümid edirəm ki, ölkəmizi və liseyimizi layiqli təmsil edəcək və qalibiyyətlə dönəcəyik”.

Komandanın 3-cü üzvü Orxan Abduləliyev da qalibiyyət qazanacaqlarına inanır: “Yarışa məsuliyyətlə və həvəslə hazırlaşırıq. İnanırıq ki, zəhmətimizin sonunda qalibiyyət olacaq və çempion kimi dönəcəyik”.

Qeyd edək ki, “VEX Robotics”  Ginnesin rekordlar kitabına düşən dünyanın ən böyük robototexnika yarışmasıdır. VEX robototexnika dərsləri şagirdlərin proqramlaşdırma, robot konstruksiyası, sensorlarla iş və avtomatlaşdırma ilə yanaşı, onların həm 21-ci əsrin bacarıqlarını, həm də gündəlik həyatda uğur qazanmaq üçün lazım olan bacarıqlarını mükəmməlləşdirir. Elm və mühəndislik prinsiplərindən başqa, VEX Robotics modellərinin qurulması zamanı qruplar arasında yaradıcılıq, komanda işi, liderlik və problemlərin həllinin daha optimal yollarının tapılmasına təşviq edir.

Kaspi Liseyinin komandasına ABŞ-da keçiriləcək final yarışmasından ÇEMPİON kimi dönmələrini arzulayırıq!

Kaspi.edu.az