Kaspi Liseyində masaüstü tennis yarışı keçirilib

Kaspi Bakıxanov Liseyində ilk dəfə olaraq “Masaüstü tennis klubu” fəaliyyətə başlayıb

Kaspi Bakıxanov liseyində ilk dəfə olaraq masaüstü tennis yarışı keçirilib. Şagirdlər 4 mərhələdən ibarət yarışlarda və final yarışında iştirak ediblər.

Liseyin sosial fəaliyyətlər üzrə rəhbəri Gülnarə Allahverdiyevanın kaspi.edu.az-a verdiyi məlumata görə, yarış iki formatda – həm şagirdlər arasında, həm də  müəllim  və şagirdlərin qarışıq komandası olaraq keçirilib.

Şagirdlər arasında keçirilən yarışda I yerin qalibi 8B sinif şagirdi Məhəmmədrza Qafarov, II yerin qalibi 8B sinif şagirdi Abdullah Əliyev, III yerin qalibi isə 8A sinif şagirdi Turan Hüseynzadə olub.

Liseyin direktoru Cahid Hüseynov bildirir ki, liseydə bu tip dərnəklərin fəaliyyəti, uşaqların maraq, meyl və bacarıqlarının, intellektual səviyyələrinin üzə çıxarılmasında, onların yaradıcılıq qabiliyyətlərinin inkişafında, fiziki cəhətdən sağlam böyümələrində böyük rol oynayır. “Tennis yarışlarının təşkili də həm şagirdlərin asudə vaxtlarını səmərəli keçirməyə, həm də onların idmana məhəbbət ruhunda tərbiyə olunmaları məqsədi daşıyır”.

Qeyd edək ki, “Masaüstü tennis klubu” liseydə bu il fəaliyyətə başlayıb. Klubun rəhbəri Rövşən Dünyamalıyev klubun fəaliyyətini yüksək dəyərləndirərək bildirir ki, bu, şagirdlərin fiziki sağlamlıqlarını qorumaq üçün gözəl imkandır: “Tennis diqqət, hərəkətlilik və cəldlik kimi  qabiliyyətləri inkişaf etdirməyə çalışarkən şagirdlərin bir addım öndə irəliləməsinə təkan verir”.

Tennis klubunda şagirdlərin mütəmadi məşqləri, oyunları, siniflərarası yarışlar və s. keçirilməsi nəzərdə tutulub.

kaspi.edu.az