Kaspi Bakıxanov Liseyi “Bilik Günü”nü təntənə ilə qeyd etdi

Kaspi ailəsinin üzvü olmaq, buradakı müəllimlər sayəsində sevgi ilə elmə yiyələnmək bir fərqlilikdir

“Bu gün yeni tədris ilinin başlanğıc günüdür. İlk gün həyəcanı, tətildən qayıdıb doğma məktəbə qovuşmaq, müəllimlərimizlə, sinif yoldaşımızla yenidən bir araya gəlmək gözəl hissdir”. Kaspi Bakıxanov Liseyinin “Bilik Günü” tədbiri şagirdlərin bu ürək sözləri ilə başladı.

Tədbirdə Azərbaycan Respublikasının Dövlət Himni səsləndi. Vətənimizin bütövlüyü uğrunda canından keçən şəhidlərimizin ruhu bir dəqiqəlik sükutla yad edildi.

“Yeni tədris ilinin ilk günündə- Bilik Günündə hər birinizi xoş gördük”- deyə Kaspi Təhsil Şirkətinin Baş direktor müavini Sahil Əliyev açılış nitqi ilə çıxış edərək şagirdləri, valideynləri və müəllimləri təbrik etdi.

Bakıxanov Liseyinin direktoru Cahid Hüseynov liseyin kollektivini və şagirdləri təbrik edərək hamıya yeni tədris ilində uğurlar arzuladı.

Liseyin ibtidai siniflər üzrə direktor müavini Töhfə Miriyeva da şagird və valideynlərə ürək sözlərini söylədi.

“Bu gün müstəqil Azərbaycanın gələcəyi olan biz gənclərin boynuna düşən vəzifə savadlı bir gənc olaraq yetişib vətənimizin gücünə-güc qatmaqdır. Biz “Kaspi” liseyinin şagirdləri olaraq daim uğurlara imza atacağımıza, milli-mənəvi dəyərlərimizə sadiq qalaraq Azərbaycanı bütün dünyada tanıdacağımıza  söz veririk!”- deyən aparıcının səsinə liseyin bütün şagirdləri səs verdi. 

Məktəbin həyətində start götürən tədbir zalda davam etdirildi. Şagirdlərin mahnı və rəqsləri, şeirləri “Bilik günü”nə fərqli bir ovqat qatdı. Gözlərində təəccüb və sevinc bir-birinə qarışan birincilər də “Bilik Günü”nə öz töhfələrini verdilər. “Bu gün birincilərin elm pilləsinə qədəm qoyduğu gündür. Bu yolda sizlərə uğurlar arzulayırıq. Siz bu liseydə elmlə yanaşı həm də gözəl bacarıqlara yiyələnəcəksiz. Kaspi ailəsinin üzvü olmaq, buradakı müəllimlər sayəsində sevgi ilə elmə yiyələnmək bir özəllik, fərqlilikdir”- deyə 1-cı sinif şagirdləri müəllimləri ilə birgə alqışlar altında sinif otaqlarına yola salındı. 

2024/25-ci ilin ilk zəngi şagirdləri siniflərə səslədi.

Kaspi Təhsil Şirkəti “Bilik günü” münasibətilə bütün məktəbliləri, müəllimləri və valideynləri təbrik edir, hamıya yeni tədris ilində uğurlar arzulayır. 

kaspi.edu.az