27 Sentyabr - Anım Günüdür
Kaspi təhsil müəssisələrində bu tarixlə bağlı tədbirlər keçirilir
27 sentyabr - müasir tariximizin şərəfli günüdür. Ermənistanın ölkəmizə qarşı 2020-ci il sentyabrın 27-dən başlayan növbəti hərbi təcavüzünə cavab olaraq, müzəffər ordumuz Ali Baş Komandan İlham Əliyevin rəhbərliyi altında işğalda olan torpaqlarımızın azad edilməsi məqsədilə Vətən müharibəsinə başlayıb.
Kaspi.edu.az xəbər verir ki, Azərbaycan Respublikasının suverenliyi və ərazi bütövlüyü uğrunda gedən mübarizədə rəşadət göstərən əsgər və zabitlərimiz, arxa cəbhədə çalışan mülki insanlarımız, bütövlükdə xalqımız əzm və iradə, bir yumruq kimi birlik və həmrəylik nümayiş etdirərək, düşmənə sarsıdıcı zərbələr endirib. Müzəffər Azərbaycan Ordusunun zəfər yürüşünə tab gətirməyən düşmən 44 gün ərzində bir neçə dəfə təxribatlara əl ataraq, günahsız mülki insanları hədəfə almaqla müharibə cinayətləri törədib. Lakin bütün bunlara baxmyaraq 30 ilə yaxın müddətdə işğal altında olan torpaqlarımız qəhrəman şəhidlərimizin, əsgər və zabitlərimizin, qazilərimizin qanı və canı bahasına azad olunub.
Azərbaycan hər zaman mübariz oğul və qızlarının şücaətini yüksək qiymətləndirir, bütün şəhidlərimizin ruhuna ehtiram göstərir, xatirəsini uca tutur. Vətən müharibəsində qəhrəmancasına döyüşmüş, ölkəmizin ərazi bütövlüyü yolunda canlarını fəda etmiş əsgər və zabitlərimizə, bütün şəhidlərimizə dərin ehtiram əlaməti olaraq, Azərbaycan Prezidenti İlham Əliyevin 2020-ci il 2 dekabr tarixli Sərancamı ilə hər il sentyabrın 27-si Azərbaycan Respublikasında Anım Günü kimi qeyd edilir.
Kaspi Təhsil Şirkətinin müəssisələrində 27 Sentyabr -Anım Günü münasibətilə tədbirlər keçirilir. “Qarabağ Azərbaycandır” şüarı ilə keçirilən Anım tədbirlərində Vətən torpaqlarının azadlığı uğrunda şəhid olan övladlarımızın xatirəsi hörmətlə anılır, igid qzilərimizin, veteranlarımızın döyüş yolundan danışılır. Onların qəhrəmanlığından, örnək həyat yollarından bəhs edən videoçarxlar nümayiş etdirilir, tariximizdən faktlarla söhbət açılır. Şagirdlərə vətənpərvərlik ruhunun aşılanmasında, tariximizi öyrənmələrində bu tədbirlərin böyük rolu var.
Allah bütün şəhidlərimizə rəhmət eləsin!
Kaspi edu.az