Liseydə “Məzun günü”
Məzunlar çıxış edərək liseydə keçirdikləri illəri dərin minnətdarlıq hissi ilə xatırlayıblar
Kaspi Ağ Şəhər liseyində Gənclər Günü münasibətilə ənənəvi “Məzun günü” təşkil olunub. Tədbirin əsas məqsədi lisey məzunları ilə hazırda təhsil alan şagirdlər arasında mənəvi bağlılığın möhkəmləndirilməsi, institusional dəyərlərin təbliği, eyni zamanda təhsil müəssisəsinin formalaşdırdığı akademik və mədəni ənənələrin davamlılığının təmin edilməsidir.
Tədbirdə Kaspi Təhsil Şirkətinin təsisçisi, filologiya elmləri doktoru Sona Vəliyeva açılış nitqi ilə çıxış edərək Kaspi liseylərinin formalaşdırdığı müasir təhsil konsepsiyasından, gənclərin intellektual potensialının inkişafında liseyin rolundan, həmçinin məzunların cəmiyyətə inteqrasiyasında məktəb illərində qazanılan bilik və dəyərlərin əhəmiyyətindən bəhs edib. Təsisçi məzunları əldə etdikləri nailiyyətlər münasibətilə təbrik edərək, onlara gələcək akademik və peşə fəaliyyətlərində uğurlar arzulayıb.
Tədbirdə Kaspi Təhsil Şirkətinin baş icraçı direktoru Elşən Əliyev, liseylər üzrə baş direktor Sahil Əliyev, Kaspi Ağ Şəhər liseyinin direktoru Həsən Həsənov, həmçinin əvvəlki tədris ilinin məzunları iştirak ediblər. Çıxış edən qonaqlar liseyin təhsil strategiyası, şagirdyönümlü yanaşması və innovativ pedaqoji mühiti barədə fikirlərini bölüşüb, məzunların uğurlarının məhz bu sistemli və məqsədyönlü fəaliyyətin nəticəsi olduğunu vurğulayıblar.
Məzunlar çıxış edərək liseydə keçirdikləri illəri dərin minnətdarlıq hissi ilə xatırlayıb, müəllim heyətinin onların dünyagörüşünün formalaşmasında, akademik istiqamətlənməsində və şəxsiyyət kimi yetişmələrində oynadığı roldan bəhs ediblər. Məzunların ürək sözləri tədbir iştirakçıları üçün həm motivasiyaedici, həm də maarifləndirici xarakter daşıyıb.
Tədbirin sonunda “Məzunlar günü”nə həsr olunan tort kəsilib, daha sonra musiqi sədaları altında bədii hissə və rəqs proqramı təqdim olunub.
Bu mərhələ tədbirin qeyri-rəsmi hissəsi olmaqla, iştirakçılar arasında ünsiyyətin güclənməsinə, emosional bağlılığın artmasına və müsbət psixoloji mühitin formalaşmasına şərait yaradıb.
Tədbirin sonunda məzunlarla xatirə şəkilləri çəkilib.
Bu mərhələ yalnız bir anın deyil, eyni zamanda Kaspi Ağ Şəhər Liseyinin təhsil tarixində mühüm mərhələni əks etdirən simvolik yaddaş nümunəsi kimi dəyərləndirilib.
Kaspiliseyi.az