Kaspi Liseyinin IX, X, XI siniflərində dərslərə start verildi
Digər siniflər üzrə dərslər 16 sentyabrda başlayacaq
Sentyabrın 2-də Kaspi Liseylərində - Kaspi Bakıxanov liseyində və Ağ Şəhər liseyində IX, X, XI siniflər üzrə dərslərə start verilib.
kaspi.edu.az xəbər verir ki, Liseyin rəhbərliyi və müəllim kollektivi 2024/25-ci tədris ilinə başlaması münasibəti ilə şagirdləri salamlayıb. Azərbaycan Respublikasının Dövlət Himni səslənib.
Yeni dərs ilində şagirdlərə uğurlar arzulayan Kaspi Ağ Şəhər Liseyinin direktoru Həsən Həsənov diqqətə çatdırıb ki, ötən tədris ilində Lisey bir sıra yerli və beynəlxalq bilik yarışlarında yüksək nəticələr əldə edib və bu uğurların davamlı olmasını təmin etmək üçün təhsil müəssisəsində daha innovativ tədris prosesinə nail olmaq prioritetdir: “Şagirdlərimizin yerli və beynəlxalq müsabiqələrdə məhsuldar inkişafına nail olmaq, olimpiadalarda davamlı olaraq yüksək uğurlar qazanmasını təmin etmək və s. kimi planlarımız var”.
IX-XI Azərbaycan bölməsi üzrə direktor müavini Elvin İsgəndərov liseydəki mövcud və yeni qaydalar, tədris proqramı, sonuncu qəbul nəticələri ilə bağlı məlumat verib. E.İsgəndərov dərslərə erkən start verilməsinin səbəbini açıqlayaraq bildirib ki, bu, proqramın mükəmməl tədris olunması, şagirdlərin sınaqlarda mütəmadi iştirakı, Buraxılış və Blok imtahanlarına daha rahat və məsuliyyətlə hazırlaşmaq məqsədi daşıyır”. E.İsgəndərov həmçinin keçən tədris ilində Lisey məzunlarının qəbul imtahanlarında 100 faizlik nəticə göstərdiklərini qürurla qeyd edib: “Hər il olduğu kimi məzunlarımız bu il də ölkənin nüfuzlu ali məktəbləri ilə yanaşı, Türkiyənin, Avropa ölkələrinin, o cümlədən, Kanadanın yüksək reytinqli ali məktəblərinə daxil olublar. Bu uğur şagirdlərimizin çalışqanlığı, gərgin zəhmətləri ilə yanaşı, Liseyin pedaqoji kollektivinin peşəkar və məsuliyyətli əməyinin nəticəsidir”.
Liseyin V-XI Rus bölməsi üzrə direktor müavini Səbinə Hüseynova qeyd edib ki, yeni tədris ili Lisey üçün ona görə əlamətdardır ki, Kaspi liseyinin rus bölməsinin ilk məzunlarının buraxılışı olacaq: “Liseyimiz ilk dəfə olaraq rus bölməsinin ilk məzunlarının buraxılışını həyata keçirəcək. İlk dəfə olaraq biz Son zəng proqramımızı həm rus, həm də Azərbaycan dilində birgə həyata keçirəcəyik”.
V-VIII Azərbaycan bölməsi üzrə direktor müavini Fidan Səfərova şagirdlərə uğurlar arzulayıb və uğurlu tədris ili olacağına əminliyini bildirib.
Kaspi Ağ Şəhər liseyinin sosial fəaliyyətlər və məzunlarla iş üzrə rəhbəri Elnur Əzizov diqqətə çatdırıb ki, liseydə bütün siniflər üzrə müvafiq olaraq dərnək və klubların sayı artırılacaq: “Bu ildən etibarən dərnək fəaliyyətlərinin daha çox olması üçün çalışacağıq. Şagirdlərin akademik nailiyyətləri önəmli olduğu kimi sosial fəaliyyətləri də, dərnəklərdə iştirakları da vacibdir. Bu, onların sosial fəaliyyətlərinin inkişafına təkan verəcək, bir fərd kimi yetişmələrində, yumşaq bacarıqlarının formalaşmasında, gələcəkdə xaricdə təhsil almaları üçün ünsiyyətlərinin inkişafında böyük rol oynayacaq”.
Xatırladaq ki, Kaspi Bakıxanov Liseyi də sentyabrın 2-də IX-X-XI siniflər üzrə dərslərə start verib.
Özəl təhsil müəssisəsində digər siniflər üzrə dərslər 16 sentyabrda başlayacaq.
Kaspi Təhsil Şirkəti 2024/25-ci tədris ilində Liseydə təhsil alan bütün şagirdlərə uğurlar arzulayır!
kaspi.edu.az