Zəfər Muzeyinə ekskursiya

Müasir Azərbaycan tarixini daha dərindən öyrənmək üçün tədris fəaliyyəti

Kaspi Ağ Şəhər liseyinin 10-cu sinif şagirdlərinin Zəfər Muzeyinə ekskursiyası təşkil olunub. Maarifləndirici ekskursiya zəngin tarixi irsimizin mühafizəsi və gənc nəslin vətənpərvərlik duyğularının gücləndirilməsi məqsədi ilə həyata keçirilib. 
Lİseyin məlumatında qeyd edilir ki,  ekskursiya çərçivəsində şagirdlərə muzeyin ekspozisiyalarında nümayiş etdirilən Vətən müharibəsi dövrünə aid faktoloji materiallar, arxiv sənədləri, xronoloji ardıcıllıqla təqdim olunan hərbi əməliyyatların taktiki-strateji xəritələri və interaktiv multimedia sistemləri barədə geniş məlumat verilib: "Muzey mühitində tətbiq olunan müasir ekspozisiya texnologiyaları – rəqəmsal audio-vizual təqdimatlar, 3D modelləşdirmə nümunələri və dinamik işıqlandırma sistemi  şagirdlərin döyüş əməliyyatlarının mahiyyətini daha dərindən anlamağına imkan yaratdı. Onlar həmçinin qəhrəman hərbçilərimizin şəxsi əşyaları, orden və medallar, eləcə də müharibə dövrünün real mənzərələrini əks etdirən foto-sənəd nümunələri ilə tanış olaraq tarixi proseslərin elmi faktlara əsaslanan izahını dinlədilər".
Ekskursiya zamanı şagirdlərə müharibənin siyasi-geostrateji səbəbləri, əməliyyatların mərhələli inkişaf dinamikası, həmçinin Azərbaycanın ərazi bütövlüyünün bərpasında mühüm rol oynayan hərbi, diplomatik və informasiya amilləri haqqında sistemli məlumat təqdim edilib. Tədris yönümlü  ekskursiya həm şagirdlərin analitik təfəkkürünün inkişafına, həm də milli fərdliliyin formalaşmasında tarixi yaddaşın əhəmiyyətinin elmi prizmadan dərk edilməsinə töhfə verib.
Zəfər Muzeyinə təşkil edilən  ekskursiya şagirdlərin müasir Azərbaycan tarixini daha dərindən öyrənmələri, hadisələri elmi faktlar vasitəsilə təhlil etmələri və milli dəyərlərə əsaslanan dünyagörüşün gücləndirilməsinə xidmət edən mühüm tədris fəaliyyətlərindən biri kimi həyata keçirilib.  

Kaspi.edu.az