Liseyin məzunu şagirdlər qarşısında

Kaspi Bakıxanov liseyinin məzunu Mirkazım Seyidzadə 11-ci siniflərlə təşkil olunan seminarda iştirak edib

Liseydən verilən məlumatda bildirilir ki, M.Seyidzadə  2018-ci ildə Bakıxanov liseyini bitirib.

Daha sonra o, Londonda bakalavr təhsili alıb. Hal-hazırda Jenevədə doktorantura (PHD) səviyyəsi üzrə təhsilini davam etdirir: “Məzunumuz hazırda Londonda qurduğu, 4 mindən artıq istifadəçisi olan startap və ilk tələbə konsyerj (concierge) haqqında məlumat verdi. Təqdimat “TALAB”- ilk tələbə konsyerj mobil tətbiqi haqqında idi. “TALAB” sözü Azərbaycan, türk və ərəb sözlərindən yaranaraq “təlabat” və ya  “tələbə” mənasını verir”.

Qeyd edildi ki, mobil tətbiq 5 ay ərzində artıq 4.500-dən çox istifadəçi toplayıb. Tətbiqin həmtəsisçisi M.Seyidzadə bildirib ki, ideya onun öz həyat təcrübəsindən və qarşılaşdığı çətinliklərdən irəli gəlib.

Bu baxımdan, tələbələrin həyatını asanlaşdıracaq mobil tətbiq qurmaq haqqında düşünüblər: “Mobil tətbiq vasitəsilə azərbaycanlı və xarici tələbələr onların təhsil alacağı universitetdəki digər tələbələrlə əlaqə quracaqlar. Bundan başqa, kirayə ev tapmaq, hava limanından qarşılanma, ev təmizliyi, müxtəlif ölkələrə vizaların alınması kimi funksiyalardan da istifadə edə biləcəklər”.

Seminarda liseyin şagirdləri iştirak ediblər.

kaspi.edu.az