Kaspi Ağ Şəhər Liseyində Araşdırma və İnkişaf Mərkəzi yaradılıb

Liseyin direktoru: “Qlobal bilik iqtisadiyyatında təhsil müəssisəsi olaraq rəqabət qabiliyyətimizi artırmaq üçün bu mərkəzin yaradılması zəruri hesab edilir”

Kaspi Ağ Şəhər Liseyi fəaliyyətində daha bir yeniliyə imza atıb. Liseydə xüsusi təşəbbüs göstərən bir qrup şagird və müəllimdən ibarət Araşdırma və İnkişaf mərkəzi (R&D) yaradılıb.
kaspi.edu.az Liseyin direktoru Həsən Həsənovla müsahibəsində Mərkəzin yaranmasının məqsəd və gələcək planları barədə məlumat alıb.

Rəqabət qabiliyyətimizi artırmaq üçün

-Həsən müəllim, Araşdırma və inkişaf Mərkəzi hansı məqsədlə yaradılıb?
-Məktəbimizdə Araşdırma və İnkişaf (R&D) mərkəzinin yaradılması, təhsil müəssisəmizin elmi tədqiqatlara və texnoloji yeniliklərə olan diqqətini artırmaq məqsədi daşıyır. R&D mərkəzi, müəllimlərin və tələbələrin yaradıcılığını, elmi düşüncə tərzini inkişaf etdirmək, innovativ tədris metodlarının tətbiqini genişləndirmək və dünya təhsil standartlarına uyğunlaşmaq üçün yaradılıb. Qlobal bilik iqtisadiyyatında təhsil müəssisəsi olaraq rəqabət qabiliyyətimizi artırmaq üçün bu mərkəzin yaradılması zəruri hesab edilir.

-Mərkəzdə hansı layihələri həyata keçirmək  planlaşdırılır?
-Mərkəzimiz bir sıra əsas sahələrdə fəaliyyət göstərəcək:

-Elmi tədqiqatlar – Müəllimlər və tələbələr birlikdə müxtəlif sahələrdə elmi tədqiqatlar aparacaqlar. Bu tədqiqatlar nəticəsində əldə olunan biliklər, tədris prosesində istifadə olunacaq və dünya təhsilinə yeni töhfələr veriləcək;

-İnnovasiya layihələri – Tələbələr və müəllimlər texnoloji yeniliklər və innovasiyalar üzərində çalışacaq. Bu layihələr məktəbdəki tədris prosesini daha interaktiv və müasir etməyi hədəfləyir;

-Beynəlxalq əməkdaşlıq – Mərkəzimiz beynəlxalq təhsil müəssisələri və elmi institutlarla əməkdaşlıq quraraq qlobal səviyyədə təcrübə mübadiləsi və birgə tədqiqat layihələrində iştirak etməyi planlaşdırır.

Regionda liderlik hədəfi

-Mərkəz hansı nəticələri hədəfləyir?
-Mərkəz olaraq, təhsil mühitimizi tədqiqat əsaslı öyrənmə modeli ilə gücləndirmək və tələbələrimizin qlobal rəqabətə hazırlıqlı olmasını təmin etmək əsas məqsədimizdir. Biz həm yerli, həm də beynəlxalq səviyyədə elmi məqalələrin dərc edilməsi, beynəlxalq konfranslarda iştirak, həmçinin innovativ tədris metodlarının tətbiqi və yayılması kimi nəticələrə nail olmağı hədəfləyirik. Uzun müddətli hədəfimiz, məktəbimizin elmi və tədris mühitini regionda lider etməkdir.

Artıq bir qrup şahirdimiz COP29 ərəfəsində ölkəmizdə təşkil olunacaq Beynəlxalq Layihə Olimpiadası üçün hazırlıqlara başlayıb və bu Mərkəzin açılış məqsədi də bu cür olimpiadalara daha yaxşı hazırlaşmaqdır.

Liseyin şagirdlərinin hazırladıqları aşağıdakı videolardan ətraflı məlumat ala bilərsiniz:

1. https://www.youtube.com/watch?v=YWCppe7NkWc

2. https://www.youtube.com/watch?v=2yRfSiOm-oU

3. https://youtu.be/-xDalu5D5lU?si=bw6lq9GYxbW4g78a

kaspi.edu.az